RIS3 Euskadi espezializazio adimentsuko euskal estrategiari buruzko prestakuntza-programa
Innobasque agentziak doako prestakuntza-programa eskainiko du, RIS3 Euskadi espezializazio adimentsuko euskal estrategiak eskaintzen dituen aukeren, laguntzen eta jardunbide onen inguruan. Prestakuntza-eskaintza hori “RIS3 estrategiaren lurralde-hedapena” izeneko ekimenaren parte da, zeinaren bidez azken bi urteetan 25 ikastaro eskaini zaizkien bitarteko agenteen 400 ordezkari baino gehiagori; azken horiek inguruko enpresa eta ETE-ei RIS3 Euskadi estrategiarekin lotutako aukerak helarazi dizkiete.
Programa horren xedea da bitarteko agenteen esku jartzea ezagutzak, kontzeptuak eta tresnak, euren eragin-esparruko ETE-ei helarazteko eta RIS3 estrategiaren alorrei lotutako lankidetzako berrikuntza-proiektuak sustatzeko.
Zein gaietako prestakuntza eskainiko da?
- Kontzeptuen, aukera-eremuen eta teknologien inguruko ezagutzak, baita RIS3 espezializazio adimentsuko estrategiaren 7 alorretako tresnak ere.
- Berrikuntzaren eta I+G delakoaren kontzeptuak eta tresnak.
- Merkatuko berrikuntzaren eta negozio-ereduen berrikuntzaren kontzeptuak eta kasu praktikoak.
- Enpresen berrikuntza-profilak egiteko eta lankidetzako proiektuak aurrera eramateko metodologiak.
- Horizon Europe programak eta I+G+b arloko beste Europako programa batzuek eskaintzen dituzten aukerak identifikatzeko kontzeptuak eta tresnak, Euskadiko enpresen parte-hartzea sustatzeko.
Nori dago zuzenduta?
ETE-en gertuko lurralde-eragileei: tokiko garapen-agentziak, lanbide-heziketako zentroak, klusterrak, merkataritza-ganbarak, patronalak, etab.
Zein arlotan?
RIS3 Euskadi estrategiak I+G eta berrikuntzako zazpi alor identifikatu ditu: fabrikazio aurreratua, energia, biozientziak/osasuna, elikadura, hiri-habitata, kultura- eta sormen-ekosistemak eta -industriak, balio eta potentzial handienak edukitzeagatik.
Elikaduraren arloan, RIS3 estrategiak honako lehentasun hauen alde egiten du:
- Elikadura osasuntsua – dieta pertsonalizatua.
- Elikagaiak ekoizteko sistema berriak.
- Bereziki ahulak diren biztanleentzako garapen gastronomiko berriak: Haurrak eta seniorrak.
- Kalitatezko elikadura segurua. Hautemate- eta kontserbazio-teknologia berriak.
- IKTak ekoizpen-, logistika- eta komertzializazio-prozesuetan gehitzea.
- Kontsumo-joera berrietara egokitutako erabilgarritasun-prestazio berriak dituzten elikagaiak.
Noiz eta nola?
Prestakuntza-saioa urte honetako uztailaren eta abenduaren artean eskainiko da , webinar-formatuan.