Zirkulartasunaren arloko Deialdi Bateratua abiarazten dugu!

Animalia Ekoizpeneko sistema jasangarrien ERA-NET SusAn eta beste 3 ERA-NET (FACCE ERA-GAS, nekazaritzako eta basogintzako berotegi-efektuko gasen zaintza eta murrizketari dagokiona, ICT AGRI-FOOD, IKTen aplikazioa duten nekazaritzako elikagaien sistemei dagokiena, eta SusCrop, labore jasangarrien ekoizpena) koordinatu egin dira eta indarrak batu dituzte guztiei interesatzen zaizkien eremuetan; horri esker, finantzaketa-ekimen bateratu eta transnazional bat ezarri dute berotegi-efektuko gasak ikertzeko, arreta berezia jarrita labore mistoen eta abeltzaintza sistemen zirkulartasunean, klima-aldaketa moteldu eta aldaketa horretara egokitzea xede.

Deialdiaren xedea da nekazaritzako eta abeltzaintzako sistemak (berr)integratzea, eta, hala, sistema horien arteko zirkulartasuna hobetzea, baita ustiategietako jasangarritasuna hobetzea eta berotegi-efektuko gasen eragina murriztea ere.

Deialdi bateratu horrek 16 milioi euroko aurrekontua du eta zenbateko hori 30 erakunde publiko finantzatzailek jarri dituzte eskuragarri. Erakunde horiek Europako 16 herrialdetakoak, EBri loturiko 3 herrialdetakoak eta EBtik kanpoko 4 herrialdetakoak dira.

Eusko Jaurlaritzak, ELIKAren laguntza teknikoarekin, 100.000 € jarriko ditu proiektuak aurkezten dituzten edo proiektuetan parte hartzen duten I+B arloko euskal erakunde publiko eta pribatuak finantzatzeko. Horretarako, partzuergo transnazionalak sortu beharko dira eta bete egin beharko dira finantza-erakunde bakoitzari dagozkion estatuko/eskualdeko arauak.

2021eko deialdi bateratuan proposamenak aurkezteko fase bakarra egongo da eta azken eguna 2021eko maiatzaren 26a izango da.